Сериозен потрес во српскиот финансиски сектор. Давор Мацура, сопственикот на „Алта банка“, заврши во полициски притвор по акцијата што ја спровеле надлежните служби во просториите на банката, а која, според објавените информации, траела повеќе од 30 часа.
Приведувањето на Мацура следувало по вистински финансиски пресврт за институцијата. Имено, додека полицијата вршела претрес во банкарските простории, Народната банка на Србија донела одлука со која на „Алта банка“ ѝ ја одзела дозволата за работа.
Според информациите објавени во медиумите, полициската акција започнала во саботата, истиот ден кога Извршниот одбор на српската централна банка ја донел одлуката за одземање на лиценцата. Воедно, во објавите се наведува дека за банката бил прогласен и стечај.
Засега останува нејасно што точно го предизвикало приведувањето на Мацура. Нема официјално објаснување за евентуалните сомневања, ниту, пак, се соопштени детали за тоа што откриле истражителите при долготрајниот претрес.
Случајот отвора низа прашања за работењето на банката и околностите под кои дошло до одземањето на дозволата, но одговорите ќе треба да ги дадат надлежните институции.
Засега нема потврдени информации за конкретни кривични дела што му се ставаат на товар на Мацура, па приведувањето не треба да се толкува како доказ за негова вина пренесува вечер прес.

