Учениците Марин Христоски и Алексеј Мицкоски од Основното општинско училиште „Кире Гавриловски-Јане“ од Прилеп, под водство на професорката Соња Јорданоска, триумфираа со освојување на второто место на Европскиот квиз на пари за 2025 година, кој се одржа на 23 мај во Брисел.
На ова исклучително меѓународно натпреварување за млади во сферата на финансиската писменост, во конкуренција меѓу државите на Европа, првото место го зазеде ученички тим од Италија, додека третото место му припадна на тим од Шведска.
Овој проект за финансиска едукација на ученици на возраст од 13 до 15 години е инициран од Европската банкарска федерација и се реализира од 2017 година. Македонската банкарска асоцијација (МБА) е организатор на националниот натпревар и го поддржува учеството на победничкиот тим на Европскиот квиз на пари.
Признание за успехот на учениците и нивниот ментор денес на настан во МБА им оддадоа министерката за образование и наука Весна Јаневска и гувернерот на Народната банка Трајко Славески.
Министерката Јаневска нагласи дека темите од финансиската писменост во нашиот образовен систем се изучуваат интегрирано, во повеќе наставни предмети. „Децата учат како да управуваат со парите, како да креираат буџет, како да пресметуваат ризици и освојувањето второ место во Брисел е доказ дека имаме успешно спроведување на програмите. Македонија и минатата и оваа година покажува дека изобилува со таленти односно со ученици кои освојуваат први до трети награди во големо количество, а МОН е тука да ги поддржи. Во новата законска регулатива предвидуваме поддршка и за учениците, но и за организаторите, кога има потреба, на меѓународни олимпијади или друг тип натпревари“, рече Јаневска.
Маја Стевкова Штериева, претседателка на Македонската банкарска асоцијација, изјави дека нашите ученици го заслужиле второто место во конкуренција на приближно 70 000 ученици од цела Европа, откако триумфираа и на Националниот квиз на пари. „Во седум години, колку што Македонската банкарска асоцијација го организира овој настан, испраќаме македонски тимови на натпреварувањето во Брисел, четири пати сме биле меѓу првите три европски тимови. Тоа за нас навистина претставува големо задоволство и голема радост што децата се заинтересирани. Тоа придонесува за нивна финансиска едукација и воопшто за населението“, изјави Стевкова Штериева.
