Во Офицерски дом, изминатиот викенд, беше отворена самостојната изложба на фотографката Ивона Кочов со наслов „Пркос кон заборавот“, која се одржува во рамките на Битолското културно лето „Битфест“.
Изложбата претставува своевиден омаж на значајни личности од Битола кои со својот труд, интелект и посветеност оставиле траен печат во културниот, општествениот и професионалниот развој на градот.
Преку 32 фотографии, Кочов долови различни профили – од занаетчии, уметници, професори и лекари, до спортисти и судии – сите тие личности кои со своето дело дале непроценлив придонес за Битола. Фотографиите ја нагласуваат мултикултурната слика на градот и сведочат за богатото културно и историско наследство кое продолжува да живее преку своите луѓе.
Авторката истакна дека изложбата е нејзин начин да ја изрази благодарноста и признанието кон овие сограѓани:
„Вечерва не сум тука само како фотограф, туку како раскажувач на приказни. ‘Пркос кон заборавот’ е мој начин да им кажам дека ги гледам, дека ги ценам и дека нивните приказни не треба да избледат”, истакна Кочов.
На изложбата се прикажани портрети на познати имиња како академскиот сликар Васко Ташковски, диригентот Љубомир Трифуновски, универзитетскиот професор Александар Стерјовски, атлетичарката Вера Вељановска, како и бројни лекари, наставници, фотографи, музичари, занаетчии и интелектуалци кои оставиле силен белег врз животот на градот.
Кочов најави дека поради големиот интерес и поддршката од публиката, во иднина ќе биде реализиран и втор дел од изложбата, кој ќе опфати уште личности кои заслужуваат признание и јавна почит.
Изложбата „Пркос кон заборавот“ може да се посети во Офицерски дом секој ден до сабота, во периодот од 08:00 до 21:00 часот.
Со овој проект, Битола уште еднаш ја потврдува својата улога како град кој знае да ги зачува и пренесе приказните на своите луѓе, а изложбата на Ивона Кочов останува траен потсетник дека додека се сеќаваме – тие личности живеат.
