Планинарот од Прилеп кој претпладнево беше пријавен за изгубен на подрачјето на Националниот парк „Пелистер“ е пронајден жив и здрав и безбедно се наоѓа во населеното место Нижо Поле, пренесува веб-сајтот Независен.
Информацијата ја потврди директорот на ЈУ Национален парк „Пелистер“, Иванчо Тошевски, кој изјави дека планинарот најверојатно избрал друга патека за движење низ планината и самостојно стигнал до селото.
„Планинарот беше телефонски достапен одреден период, по што сигналот беше изгубен. Случајот веднаш го пријавивме во СВР Битола и со екипа од Националниот парк излеговме на терен. Околу 15:50 часот бевме информирани дека лицето безбедно пристигнало во населеното место Нижо Поле“, изјави Тошевски.
Потрагата беше отежната поради непристапниот терен и временските услови, но за среќа заврши без последици по здравјето на планинарот.
Од Националниот парк „Пелистер“ апелираат планинарите и посетителите на планината да се движат по обележани патеки, да информираат за своите маршрути и да имаат соодветна опрема и комуникациски средства, особено во зимски услови.
Фото: Национален парк „Пелистер” / Апла.мк
