Градоначалникот Тони Коњановски реализира работен состанок со Христијан Тодоровски, командир на Територијалната противпожарна единица (ТППЕ) и со заменик командирот на ТППЕ, Горан Димкоски.
Првите луѓе на битолските пожарникари го информираа градоначалникот за подготвеноста на единиците со човечки и материјални ресурси, начинот на ангажирање и комуникација во системот за заштита и спасување, како и подготвеност за евентуални пожари во Пелагонија.
ТППЕ Битола дејствува на подрачјето на три општини, солидно е опремена, но постои реална потреба од зголемување на човечките ресурси и затоа локалната самоуправа ќе ја искористи мерката 6.2 од Оперативниот план за активни програми и мерки за вработување и услуги на пазарот на труд за 2025 година со што ќе може работно да се ангажираат невработени лица за превенција и заштита од пожари, соопштија од Општина Битола.
Битолските пожарникари и локалната самоуправа апелираат граѓаните да не палат оган на отворен простор, да не фрлаат стаклени шишиња и друг запалив отпад, да не палат стрништа и отпадоци и да не фрлаат отпушоци во шума или на отворен простор.
Фото: МИА
