И денеска претпладне група странски туристи во посета на Битола. Според јазикот на кој зборуваа беа од западна Европа. Една од главните локации каде застануваат, се фотографираат и водичите ги информираат е центарот на градот, односно плоштадот „Магнолија“ со споменикот Филип втори и Саат кулата. Тука има и верски објекти кои исто така се разгледуваат.
Широк Сокак без сомнение е улицата каде задолжително поминуваат разгледувајќи ја старата архитектура. Па надолу на кај Офицерскиот дом, потоа музејот, каде што се наоѓа и спомен собата на Мустафа Кемал Ататурк.
И пред неколку дена поголема група туристи беа на „Магнолија“.
Во локациите за посета е вклучен и античкиот локалитет Хераклеја.
Колку туристи ја посетуваат Битола, може да се прави анализа само според бројот на ноќевања, но не и за оние кои попатно ја посетуваат Битола, односно градот е дел од дневна посета, во рамките на нивниот аранжман во Македонија, каде главната дестинација е Охрид, каде и најчесто преноќеваат.
Познавачите на приликите велат дека од година во година се зголемува бројот на странски туристи кои доаѓаат во Битола. Една од причините велат е добрата промоција на градот, а друга понудата на туристичките агенции и нивната соработка со странските партнери во делот на влезниот туризам.
На државно ниво според Државниот завод за статистика бројот на туристите во март 2025 година изнесува 70 902, од кои 22.0% се домашни туристи, а 78.0% се странски туристи.
Бројот на ноќевањата во март 2025 година изнесува 132 015, од кои 28.0% се од домашните туристи, а 72.0 % од странските туристи.
Во периодот јануари – март 2025 година, во однос на истиот период од претходната година, вкупниот број на туристите е зголемен за 10.6 %, односно кај домашните туристи има намалување за 9.2 %, а кај странските има зголемување за 21.9 %.
Во периодот јануари – март 2025 година, во однос на истиот период од претходната година, вкупниот број на ноќевањата е зголемен за 9.1 % така што кај домашните туристи има намалување за 7.8 %, а кај странските има зголемување за 21.7 %.
Со доаѓањето на летото очекувањата се дека освен станрските туристи во Битола ќе ги има и нашите иселеници пренесува Тера.
