Ректорот на Универзитетот „Св. Климент Охридски“-Битола,, професор д-р Игор Неделковски е нов претседател на UniAdrion, академска мрежа во која членуваат високообразовни и научно-истражувачки институции од земјите во јадранско-јонскиот басен.
Ректорот Неделковски со Асоцијацијата и нејзините тела ќе претседава една година, заклучно со 31 мај 2026 година.
Академската мрежа УниАдрион е Асоцијација, востановена со цел да го промовира и поттикнува регионалниот развој преку академска и научно-истражувачка соработка меѓу членките, и содржи културна, научна, едукативна и секаков друг вид размена.
-УниАдрион е фокусирана на теми кохерентни со принципите на Стратегијата на ЕУ за јадранскиот и јонскиот регион – EUSAIR, па се до креирање заеднички студиски програми. Оваа Стратегија пак е донесена со цел подигнување на квалитетот на животната средина преку одржлив туризам и развој и одржливост на научно-истражувачката работа за зајакнување на капацитетите за перманентна заштита на водите во регионот, изјави за МИА ректорот Неделковски по изборот за претседател на УниАдрион и додаде дека за прв пат од фирмирањето на Асоцијацијата, со неа ќе претседава Македонец.
Во Асоцијацијата членуваат институции од Хрватска, Словенија, Италија, Албанија, Грција, Црна Гора, Србија, Босна и Херцеговина, а македонската академска заедница ја претставуваат трите универзитети, односно УКИМ-Скопје, УГД-Штип и УКЛО-Битола.
Фото: МИА
