Јавното претпријатие „Пазари“ – Битола како своја основна цел ја има стабилизацијата на финансиската состојба преку максимална искористеност на пазарните капацитети и деловниот простор со кој располага, со што би се обезбедиле постојани и стабилни извори на финансирање и тековна ликвидност на претпријатието, истакна директорот Драги Џаревски.
Основната дејност на ЈП „Пазари“ се реализира преку наплата на приходи од продажба на услуги на домашниот пазар и наплата на наемнини. Според Џаревски, анализата на расходната и приходната страна укажува на сериозни предизвици во работењето.
„Најголем дел од расходите, дури 83 отсто, се однесуваат на платите и другите издатоци за вработените, што е резултат на неколкукратното зголемување на минималната плата во државата, зголемените режиски трошоци и цените на материјалите за работа. Од друга страна, приходите бележат континуиран пад од околу 3 до 4 отсто годишно, поради намалениот број договори за изнајмување пазаришен простор, нелојалната конкуренција, отворањето на пилјари и големи маркети, како и застарениот ценовник кој датира од пред повеќе од 20 години“, објаснува Џаревски.
Тој нагласува дека континуираното зголемување на минималната плата дополнително го продлабочува дисбалансот меѓу приходите и расходите на претпријатието, што наметнува потреба од носење нов ценовник на услугите, усогласен со денешните економски услови.
Како еден од најзначајните финансиски ризици, директорот ја посочува појавата на нелојална конкуренција, односно нелегалната продажба на земјоделски производи на јавни површини каде што тоа не е дозволено, што директно влијае врз намалување на бројот на склучени договори и нанесува финансиска штета на ЈП „Пазари“.
Дополнителен предизвик претставува и сезонскиот карактер на земјоделските производи, при што финансиските резултати директно зависат од временските услови, понудата и цените на производите, куповната моќ на населението и квалитетот на изложената стока.
„Колку е поголема понудата на земјоделски производи на пазарот, толку се поголеми и можностите за подобар финансиски ефект. Наш најголем предизвик е санирање на финансиската состојба, за што ќе ни биде неопходна и поддршка од општинската администрација. Корекцијата на цените е една од опциите за стабилизирање на работењето, бидејќи актуелниот ценовник не одговара на денешната реалност“, истакнува Џаревски.
Во наредниот период, во рамки на финансиските можности, ЈП „Пазари“ ќе се стреми кон подобрување на условите за работа и продажба на Градскиот пазар, преку уредување на пристапната улица, реконструкција на санитарните јазли, санација на управната зграда и поставување на настрешници на тезгите и павилјоните.
За реализација на дел од овие активности, како што посочува директорот, неопходна е поддршка од Општина Битола и Советот на Општина Битола, како и целосно спроведување на законските решенија според кои пазарите се единствено организирано место за продажба на земјоделски производи и трговска стока.
„Само со почитување на законските решенија, зголемен број договори и стабилни приходи може да се подобри финансиската состојба и еколошката слика на градот. Во спротивно, ризиците ќе продолжат да се продлабочуваат“, нагласува Џаревски.
