Министерството за спорт во текот на првата година од своето дејствување има реализирано директна финансиска поддршка за македонскиот спорт во висина од 20 милиони евра. Ова беше обелоденето во годишниот извештај презентиран денес од страна на министерот Борко Ристовски.
Ристовски извести дека во рамките на оваа сума, се исплатени 550 милиони денари заостанати субвенции од претходната влада, како и 440 милиони денари како прв дел од субвенциите за 2025 година.
Покрај тоа, доделени се 500 стипендии „Спортска надеж“ за млади перспективни спортисти, а 22 еминентни спортисти добиле Национално спортско признание. “Кога го формиравме Министерството за спорт, целта беше спортот во Македонија да го добие заслуженото место како една од најважните општествени области”, изјави Ристовски.
“Една година подоцна, можам слободно да кажам дека ја остваривме првичната цел и поголем дел од тоа што го зацртавме како приоритет,” подвлече министерот за спорт, Борко Ристовски, на денешната прес-конференција при презентацијата на годишниот извештај за првата година од основањето на Министерството за спорт.
Во однос на спортската инфраструктура, Министерството има реализирано 15 новоизградени мултифункционални игралишта, 15 реконструирани спортски центри низ државата, целосна обнова на спортски сали во Радовиш и Ново Село и изградба на нова атлетска патека во Гевгелија.
Во тек се реновирања на сали во „Расадник“ – Скопје (кое завршува во октомври), Воената академија – Скопје и Универзитет „Св. Кирил и Методиј“ – Скопје.
Министерот исто така сподели дека е деблокирана изградбата на пет базени во Скопје (Кисела Вода и Ѓорче Петров), Кичево, Битола и Штип, кои ќе бидат ставени во функција до крајот на летото. Исто така, додаде дека е продолжена и изградбата на базенот во Охрид. “Ова е само почеток. Ја поставивме основата, ја враќаме довербата и сега ја носиме обврската да продолжиме уште поодлучно”, рече тој.
“Ќе продолжиме да го јакнеме спортот, да ги вреднуваме резултатите, да ги почитуваме спортистите и спортските работници и да промовираме вистински вредности. Со една и единствена цел спортот да го направиме достапен за сите, македонскиот спорт да го подигнеме на повисоко ниво, македонските спортисти гордо и достоинствено да ја претставуваат Македонија на спортските терени”, истакна министерот Борко Ристовски.
Реализацијата на капиталните инвестиции до крајот на 2024 година изнесувала 98,26 проценти, а во првите шест месеци од 2025 година е постигната реализација од 74,32 отсто.
