Септември пристигна, но летото очигледно се’ уште не планира да си замине од Битола. Топлото и пријатно време во првата сабота од месецот повторно го исполни Широк Сокак со битолчани од сите генерации.
А кога е сабота во Битола, традицијата е добро позната: време е за „корзо“.
Од кафе и средби со пријатели, до лежерната прошетка по најпознатата битолска улица „Широк Сокак“, која и денеска беше местото каде што градот го покажува својот препознатлив дух.
Секако, не изостана ниту традиционалната „развидежност“. Се гледаа новите модни комбинации, се разменуваа погледи и поздрави, се разговараше на летните тераси, а сончевото септемвриско време беше дополнителна причина саботниот ден да се помине во центарот на градот.
Млади, повозрасни, семејства со деца, битолчани кои живеат надвор од градот, но и туристи – секој со своја приказна, а сите на истото место.
Зашто во Битола „корзото“ одамна не е само прошетка. Тоа е навика, традиција и дел од градскиот идентитет што се пренесува од генерација на генерација.
Првата септемвриска сабота помина во знакот на сонцето, модата, кафето и добриот битолски муабет.
А Широк Сокак? Тој и овојпат беше најубавата сцена на градот.
