Локалната самоуправа преку реализација на повеќе проекти работи на зголемување на капацитетите на детските градинки во Битола.
Во детската градинка „Славејче“, која припаѓа на Јавната општинска установа ДГ „Мајски цвет“, постоечкиот објект кој во минатото го користела градинката сега е адаптиран и во него ќе се згрижуваат деца и ќе се користи за една воспитна група.
– Со тоа, ќе се овозможи зголемување на капацитетите на градинката, а во тек е изработката на детски игралишта, играчки, справи и реквизити во дворот на пет градинки кои се во состав на ЈОУДГ „Мајски Цвет“ Битола кои ќе бидат реализирани до крајот на овој месец и се дава можност голем дел од програмски активности да се реализираат во дворот на градинките-информираат од Битолската локална самоуправа.
За подобрување на условите во детските градинки, направено е реновирање на кујната во градинката „Коца Василевска“ и тоалетите во градинките „Славејче“ и „Пеперутка“, каде што е извршена набавка на лед сијалици и клима уреди, кујнска опрема, а подобрени се условите во речиси сите објекти.
Исто така, во детската градинка „Мајски Цвет“ заменети се старите врати од тоалетите, магацинскиот простор и кујната со нова ПВЦ дограма.
– За изведување на сите овие активности преку општинската сметка за блок дотации обезбедени се средства во износ од 11.280.510 денари-информираат од Општината Битола.
