Без договор, но со приближување на ставовите, заврши денешното продолжување на седницата на Економско-социјалниот совет во Владата на која синдикалните претставници побараа платите во јавниот сектор да се усогласат согласно инфлацијата, која минатата година беше 14,5%.
Синадикатите сметаат дека доколку од септември почне примената на општиот колективен договор за јавен сектор, функционерските плати ќе треба да се вратат пред одлуката на Уставниот суд и зголемувањето на платите да биде како за нив, така и за работниците. Дискусијата, како што објаснија, се одвивала во насока на тоа дали да се земе како параметар зголемувањето на минималната плата од 12,55% или пак колку што е зголемена просечната плата 10,9 проценти.
„ Прифатлива е иницијативата, моделот од 2,5 години за да добиеме методологија како во делот на минималната плата со тоа што ќе имаме просечна плата по коефициент на сложеност по истекот на две ипол години, но ние како ССМ сметаме дека доколку од септември се случи тоа да почне примената на општиот колективен договор за јавниот сектор функционерските плати треба да се вратат на нивото пред одлуката на уставниот суд и зголемувањето на платите да биде како за нив така и за работниците. “-Слободан Трендафилов – Претседател на ССМ.
„ Заради големиот и брзиот раст на минималната плата во однос на порастот на платите досега во јавниот сектор се направи таков дисбаланс или т.н. урамниловка која сега страшно ни создава проблеми. За да излеземе од ова еднаш засекогаш, навистина ќе треба, ја сфаќаме ситуацијата во буџетот дека не може тоа веднаш да се направи но период на усогласување 1,2,3 или не знам колку години тоа е за нас приоритет во оваа ситуација.“-Јаким Неделков – СОНК.
Вицепремиерот Фатмир Битиќи е оптимист дека наскоро ќе се изнајде сеопфатно решение. Тој вели дека платите на функционерите не се тема дискусија, бидејќи решението кое ќе го понудат ќе биде за сите.Вели не му е јасно од каде е извлечен процентот од 14,5.
-Ние на пример во моделот денеска што го презентиравме зголемувањето споредбено со септември оваа година, со септември минатата година е далеку над процентот на инфлација која ја имавме минатата година и затоа е работа на дискусија. // Сметам дека дискусијата за плати на функционери 1060 наспроти 136000 функцинери не е работа на дискусија секако решението кое ќе го дадеме ќе биде дадено за сите, а што е тоа кога ќе го постигнеме ќе го кажеме.-Фатмир Битиќи – Вицепремиер за економски прашања.
Синдикатите бараат и до крајот на годината да се исплати регрес за годишен одмор во целиот јавен сектор. Нова средба на Економско социјалниот совет е закажана за во среда во Министерството за финансии.
