Бројот на заразени со коронавирусот се зголемува ширум светот и веројатно нема да се намали наскоро, а постои и ризик од појава на нови мутации, предупреди денеска Светската здравствена организација (СЗО).
„Податоците од нашиот систем за надзор врз основа на анализи во 84 земји покажуваат дека процентот на позитивни тестови за САРС-КоВ-2 се зголемил во текот на неколку недели. Севкупно, позитивноста на тестовите е над десет проценти, но тоа варира во зависност од регионот. Во Европа процентот на позитивност е над 20 отсто“, изјави Марија Ван Керхове од СЗО, пренесе Танјуг.
Нови бранови на инфекција се регистрирани во Америка, Европа и Западен Пацифик, се наведува на веб-страницата на СЗО.
Анализите на отпадните води сугерираат дека циркулацијата на SARS-CoV-2 е два до 20 пати поголема отколку што покажуваат сегашните бројки.
„Зајакнување на кампањите за вакцинација“
Ваквите високи стапки на циркулација на инфекции во летните месеци на северната хемисфера се нетипични за респираторните вируси кои главно се шират на ниски температури.
„Во последниве месеци, без оглед на сезоната, многу земји доживеаја ненадеен пораст на КОВИД-19, вклучително и Олимписките игри каде што најмалку 40 спортисти беа позитивни“, рече Ван Керхова.
Како што вирусот продолжува да се развива и да се шири, постои се поголем ризик од посериозен вид кој не може да се открие со досега практикуваните методи или кој не реагира на медицинска интервенција.
СЗО ги повикува владите да ги засилат кампањите за вакцинација, осигурувајќи дека најризичните групи се вакцинираат најмалку еднаш на секои 12 месеци.
