Сојузот на синдикатите на Македонија (ССМ) побара од работодавачите итно да ги спроведат сите законски обврски и препораки за заштита на работниците во услови на високи температури. Синдикатот потсетува дека тропските температури кои ја зафатија земјава претставуваат директна опасност по здравјето на вработените, особено оние кои работат на отворено, и бара прекин на градежните и физичките активности во периодот од 11 до 17 часот.
Од ССМ нагласуваат дека физичката работа на отворено на температури над 30 или 35 степени Целзиусови носи ризик од топлотен удар, исцрпеност и други здравствени компликации. Затоа, препораката за прераспределба на работното време или целосен прекин на теренските активности меѓу 11 и 17 часот мора стриктно да се почитува, особено во градежниот сектор и комуналните услуги.
Покрај измените во работното време, синдикатот апелира до сите компании да задолжително обезбедат соодветни количини вода за пиење, чести паузи во ладовина и климатизирани простории за одмор. Овие мерки, според нив, се минимален стандард што секој работодавец мора да го исполни кога температурите достигнуваат критични вредности.
Синдикатот ги повика и надлежните државни органи, пред сѐ Државниот инспекторат за труд, да вршат зачестени контроли на терен. Доколку се забележат неправилности или игнорирање на препораките за безбедност и здравје при работа, ССМ бара да се преземат соодветни законски мерки против одговорните лица пренесува трн.
