Сите надежи на јавното претпријатие „Стрежево“ кое стопанисува со ски центарот „Нижеполе“ се дека во февруари за кога се очекуваат поинтензивни врнежи од снег ќе се зголеми бројот на посетители на овој ски центар сместен над селото Нижеполе на падините на Баба Планина на надморска висина од 1.300-1.610 м н. в.
Директорот на ЈП „Стрежево“ Методија Граматковски вели дека сезоната оваа година започна многу порано во споредба со претходните години, со оглед на фактот што снег заврна уште во декември.
-За жал, поради високите температури во декември, тој снег се стопи. Очекувавме да заврне повеќе снег што најмногу им е потребен на љубителите на скијањето, но, тоа не се случи. Споредбено со минатите години, оваа година е слаба со врнежи со снег, а тоа се должи заради климатските промени. Снегот што заврна пред една недела е добредојден, моментно тој е околу 30 сантиметри, екипите навремено ги подготвија терените и состојбата на ски патеките е одлична. Очекуваме во февруари врнежите од снег да се поголеми и со тоа да имаме помасовна посетеност на ски центарот „Нижеполе“-вели директорот Граматковски.
Тој додава дека треба да се направат вложувања во ски центарот.
-Како јавно претпријатие што стопанисува со ски центарот уште во 2021 година нарачавме основен проект изработен од стручни служби. Ги поминавме сите фази низ институциите и нашите очекувања се за кусо време да ја добиеме и градежната дозвола со оглед на тоа што проектот е на разгледување во Министерството за транспорт и врски и по добивањето на градежната дозвола ќе можеме да размислуваме за инсталирање на вештачки снег на ски центарот „Нижеполе“ односно да има скијање во ски центарот од декември до март, бидејќи во тој период и на Пелистер, но, и во Битола има ниски температури, но нема природен снег-вели првиот човек на „Стрежево“, Методија Граматковски кој изрази надеж дека за кусо време ќе ја добијат градежната дозвола и дека ќе се обезбедат финансиски средства.
Тие средства дали ќе се обезбедат преку Владата, дали ќе бидат сопствени средства на претпријатието, а зошто да не се вклучи тука и локалната самоуправа, бидејќи ски центарот „Нижеполе“ е од интерес за сите граѓани на Битола, но, и пошироко-додава Граматковски.
Според него ски центарот „Нижеполе“ им нуди одлични услови на љубителите на скијањето по најпристапни цени.
-Ние како ски центар ги имаме најевтините цени не само во државата туку и пошироко, се со цел што е можно повеќе граѓани, не само од Битола туку и југозападна Македонија да го посетат овој ски центар и да уживаат во природата и во белите спортови. Сезонската карта за скијање на двата ски лифта и за детскиот ски лифт изнесува пет илјади денари за возрасни, а три илјади денари за децата. Дневната карта изнесува 500 денари за возрасни, а 300 денари за деца, додека ноќното скијање изнесува 400 денари. Пристапни цени нуди и чајџилницата и да се пие чај на надморска висина од 1300 метри н. в. за 50 денари е привилегија за секого што сака да го посети нашиот ски центар-вели Граматковски.
Инаку, од ски центарот имаат организирана редарска и паркинг служба преку денот за да се избегне метеж, додека за ноќното скијање има ноќно осветлување на ски паркинзите за граѓаните да се чувствуваат безбедно а и кога ги паркираат автомобилите.
Искуствата од минатите години се дека најинтензивни врнежи од снег има во месец февруари и од ЈП „Стрежево“ кое стопанисува со ски центарот „Нижеполе“ се оптимисти дека доколку има врнежи од снег во февруари и месец март сезоната да биде успешна со задоволни посетители, што ќе значи и дополнителни приходи за јавното претпријатие.
Инаку, од Битола до ски центарот „Нижеполе“ води асфалтен пат со должина од 15 километри.
Извор: Слободен печат
