Иако недостигот од снег ја одложува официјалната скијачка сезона на Пелистер, ски-центарот „Стрежево“ и понатаму бележи зголемена посетеност и интерес од граѓаните.
Битолчани, но и гости од други градови, секојдневно ја користат можноста за престој на планина, уживајќи во чистиот воздух и зимската атмосфера на Баба Планина.
Во моментов, снежната покривка во ски-центарот изнесува околу 10 сантиметри, што не ги исполнува условите за старт на скијањето.
„За да ги пуштиме ски-лифтовите во работа потребни ни се најмалку 40 сантиметри снег. Во моментов ги немаме тие услови, но тоа не значи дека центарот е празен, напротив, интересот е голем“, вели за Македонската телевизија, Александар Цветановски од ски-центарот „Стрежево“.
Тој посочува дека и без активна ски-сезона, на ски-центарот „Стрежево“ е живо и посетено.
„Секојдневно имаме голем број посетители кои доаѓаат за прошетка, рекреација и одмор. Како ски-центар сме задоволни од посетеноста, особено ако се земе предвид дека ски-лифтовите не работат“, додава Цветановски.
Дополнителен поттик за зголемениот број посетители е бесплатниот превоз што и оваа година се организира во соработка со општина Битола, Меѓуопштинското јавно претпријатие „Пелалинк“ и јавното претпријатие „Стрежево“.
Превозот се реализира секој работен ден, со поаѓање во 08:00 часот од пред спортската сала во Битола и враќање од ски-центарот во 13:00 часот.
„Оваа мерка се покажа како одлична и значително придонесува за посетеноста, за што сме искрено благодарни“, истакнува Цветановски.
Во рамки на ски-центарот, чајџилницата работи секојдневно од 08:00 до 15:00 часот, а посетителите велат дека и без скијање, ски-центарот „Стрежево“ нуди пријатен зимски амбиент, можност за рекреативни прошетки и краток одмор од градската секојдневица.
Иако љубителите на скијањето со нетрпение ги очекуваат обилните снежни врнежи, ски-центарот „Стрежево“ и во овој период останува препознатлива и атрактивна точка за зимски одмор на Пелистер.
