Најмалку 35 лица загинаа во невремето предизвикано од снежните врнежи што ја погодија северна Јапонија во последните две недели, додека речиси 400 лица се повредени, соопшти денес јапонската влада.
Погодени се 15 префектури, а во најтешко погодените области, длабочината на снегот достигна околу два метра, објави АП.
Најголем број смртни случаи е пријавен во префектурата Ниигата – 12, вклучувајќи маж на околу 50-годишна возраст пронајден на покривот на куќа и постар маж кој паднал додека чистел снег во градот Нагаока.
Седум смртни случаи се регистрирани во префектурата Акита, а пет во Јамагата.
Бројот на повредени низ целата земја е 393, вклучувајќи 126 тешко повредени, од кои 42 во Ниигата.
14 куќи се оштетени.
Главниот секретар на кабинетот, Минору Кихара, предупреди дека топењето на снегот може да предизвика лизгање на земјиштето и ги повика граѓаните да користат шлемови и јажиња при чистење на снегот.
Властите формираа неколку работни групи за да реагираат на погодените области, а прогнозите предвидуваат повеќе снежни врнежи во текот на претстојниот викенд.
