Со светлосна проекција и завршна видео-презентација на проектот „Bitola Art Mapping“, на 31 август, Битола ќе го заокружи уште едно издание на културното лето БИТФЕСТ. Настанот ќе се одржи на платото пред Офицерскиот дом, претворајќи го овој простор во отворена сцена за современа уметност, преку спој на архитектура, светлина и визуелни ефекти.
Фестивалот БИТФЕСТ и оваа година понуди богата програма со учество на бројни домашни и меѓународни уметници, настани на повеќе локации низ градот и силен интерес од публиката. Завршниот настан, пак, не е замислен само како крај на фестивалот, туку и како отворен повик за ново културно размислување и поставување на нови стандарди во промоцијата на градот преку уметноста.
„Bitola Art Mapping“ претставува современ мултимедијален концепт кој преку видео и светлосни проекции го оживува јавниот простор, користејќи ја фасадата на објекти како уметничко платно. Преку иновативен пристап и визуелна интерпретација, проектот го претставува културното и историското наследство на Битола во ново светло, достапно за пошироката јавност.
Организаторите најавуваат дека со овој настан се отвора можност за воспоставување на нов културен формат – светлосен фестивал, какви што веќе постојат во големи европски и светски метрополи како Лион, Берлин, Атина, Прага, Сиднеј, Талин и Амстердам. Целта е Битола да се позиционира како град кој умее да го валоризира сопствениот простор, историја и уметничка традиција, преку современи изразни форми кои го зближуваат уметникот и публиката, културниот настан и туристичкиот потенцијал.
Завршниот настан е закажан за денеска, 31 август 2025 година, со почеток во 20:30 часот на платото пред Офицерскиот дом во Битола.
