Вчера започна комисиската расправа за Предлог ребалансот на Буџетот за 2025 година. Овој ребаланс не е само бројка – тоа е буџет кој припаѓа на сите граѓани и кој носи реална поддршка, развој и сигурна иднина. Буџет на кој е пристапено со особено внимание, во секоја ставка, бидејќи тоа се пари на граѓаните.
Ќе издвојам неколку најважни поенти од овој ребаланс кој го прави успешен и кредибилен:
1. Раст на приходите од 8,6% во првите пет месеци од годината покажува дека економијата ја зајакнуваме, фискалниот простор го прошируваме, а системот на наплата функционира подобро. Тоа е потврда дека создадените ресурси се плод на нашата заедничка работа.
2. Расходите растат умерено – само 5,1%, и тоа е затоа што приоритетот ни е граѓаните. Зголемени се плати и пензии, внимателно, постепено за да има за секого, а без да се нарушат економските параметри.
3. Буџетскиот дефицит останува стабилен на 4% од БДП, што гарантира фискална одговорност и стабилност на македонската економија.
4. Со ребалансот обезбедуваме дополнителни средства за важни сегменти:
– 800 милиони денари повеќе за плати
– 2,5 милијарди денари за пензии
– 300 милиони денари дополнително за капитални инвестиции – инвестиции кои ја носат иднината во вашите општини, во вашите населени места. Ќе допреме до секое едно место во Македонија.
5. Во образованието се вложуваат повеќе од 2 милијарди денари за изградба и рехабилитација на кампуси, студентски домови и училишта, а сите студенти ќе добијат ваучери од 250 евра за набавка на електронски уред.
6. Реактивиран е проектот „Купи куќа за млади“ со зголемување на средствата за 111%, што е директна поддршка за младите семејства и младите луѓе во создавање на сигурен дом. Со претходната Власт, овој проект беше нефункционален. Ние сега го враќаме на големо, на барање од младите.
7. Значителни инвестиции се планирани и во здравството, со зголемување од 237 милиони денари за изградба, реконструкција и модернизација на здравствени установи, вклучувајќи и дигитализација на здравствените услуги.
8. Јавниот транспорт и инфраструктурата добиваат нов импулс: 307 милиони денари за нови автобуси, плус 307 милиони за локални патишта и дополнителни средства за железничка инфраструктура.
9. Поддршка за спортот, културата и животната средина со значајни зголемувања, кои ги стимулираат квалитетот на живот во сите делови на државата.
Овој ребаланс е доказ дека власта на ВМРО-ДПМНЕ останува посветена на развојот, растот и грижа за граѓаните. Ние инвестираме во иднината, ги штитиме социјалните права, обезбедуваме стабилност и услови за подобар живот.
Со овој ребаланс, покажуваме дека буџетот не е само документ, туку инструмент за реални резултати – за секој граѓанин, за секое семејство, за целата држава.
изјава на Дафина Стојаноска, пратеник на Пратеничката група на ВМРО-ДПМНЕ
Пратеничка група на ВМРО-ДПМНЕ
Фото: МИА
