Субвенциите за тутунарите во износ од две милијарди денари ќе бидат исплатени во текот на денешниот и утрешниот ден, иако законскиот рок за исплата е до 30 јуни, соопшти премиерот Христијан Мицкоски при посетата на Битола.
Тој посочи дека Владата одлучила средствата да бидат исплатени порано, нагласувајќи дека земјоделците ќе ја добијат поддршката пред предвидениот рок.
„Оваа Влада, за две години, има исплатено околу 15 милијарди денари, што е околу една милијарда денари повеќе отколку што претходната влада исплатила за три години. Тоа се бројки кои ја покажуваат реалната состојба“, изјави Мицкоски.
Премиерот додаде дека кога новата влада ја презела функцијата во 2024 година, биле исплаќани заостанати субвенции од претходни години, додека сега, според него, се исплаќаат тековните субвенции за 2025 година.
Според неговите податоци, вкупната поддршка што ја исплатиле претходните влади во периодот од 2021 до 2023 година била под 14 милијарди денари, додека актуелната влада за пократок период исплатила околу 15 милијарди денари пренесува бизнис вести.
Мицкоски се осврна и на откупната цена на тутунот, посочувајќи дека денес договорите се склучуваат со значително повисоки цени.
„Пред неколку години тутунот се откупуваше по околу 150 денари за килограм, а сега договорите се за околу 450 денари“, рече тој.
Тој нагласи дека се зголемиле и произведените количини – од околу 16 до 18 милиони килограми во минатото, на 26 до 28 милиони килограми во последниот период.
Премиерот ја обвини опозицијата дека ги манипулира земјоделците и граѓаните, додавајќи дека Владата ќе продолжи да работи на економски развој и поддршка на земјоделскиот сектор.
