Васко Мавровски, директор на НУ Народен театар - Битола
Во интервју за Шеталиште, директорот на НУ Народен Театар – Битола, Васко Мавровски, открива како за само неколку месеци успеале да ја вратат публика, да ја оживеат сцената со 11 премиери и да привлечат над 14.000 гледачи.
Шеталиште: Единаесет премиери за девет месеци, од кои четири во 2025 година. Дали битолскиот театар е повторно „театар на граѓаните”?
Васко Мавровски: Дефинитивно театарот е повторно на публиката! Поминуваме низ многу тежок период најмногу поради долгот кој го наследив, но, од друга страна пак тие пречки кај мене раѓаат многу инвентивни и креативни решенија кои вродуваат со плод. Стратегијата која ја најавив во септември која опфаќаше работа со млади македонски автори, вклучувањето на македонска драматургија на репертоарот, враќањето на неколку култни комедии и поставувањето на две нови комедии, сето тоа под мотото „Театарот повторно твој!” се покажа дека е правилна и по мерка на битолската публика. Во само 6 месеци успеавме да изиграме повеќе претстави и да донесеме повече публика отколку во цела 2014 година, пред фактите и боговите молчат!
Шеталиште: Од февруари годинава сте директор на установата, а претходно од септември 2024 година бевте вршител на должност. Како ја доживеавте трансформацијата од актер во директор на театарот и кои беа најголемите предизвици со кои се соочивте?
Васко Мавровски: Работата на еден актер е многу брзо од вечер во вечер да се трансформира од еден во друг лик и веројатно тоа ми помогна многу брзо да се адаптирам на новата улога директор на НУ Народен Театар Битола. Веројатно успешноста во раководењето ја пресликав од моето 15 годишно искуство од менаџирањето на мојот Бабец театар и првиот интернационален детски театарски фестивал во Македонија, Битолино. Предизвиците беа многу, дел од нив успеав да ги решам и надминам во рекордно време, дел се уште ги решавам и веројатно повратната позитивна реакција од публиката ми дава уште поголем мотив и ми ја разгорува страста кон овој театар да го вратам на вистинската патека и да создадам нова златна епоха за истиот.
Шеталиште: Господине Мавровски, што се случува зад сцената на Народен театар – Битола? Како изгледа процесот на избор на претстави и составување на тимот?
Васко Мавровски: Зад кулисите се раѓаат идеите за новите претстави, се случуваат креативни процеси кои секогаш со љубов се подготвуваат за публиката, со еден збор се случува живот. Изборот на претставите, ги избираат стручните соработници, на мој предлог, уметничкиот совет кој за прв пат во мое време беше формиран во НУ Народен Театар Битола, а во однос на распределбата на улоги главниот збор го имаат режисерите, се борам да бидат ислободени од секаква цензура или влијание од трети лица и засега тоа успешно го менаџирам.
Шеталиште: Забележителен е порастот на публиката во Народниот театар во Битола, особено на младата популација. Каква е стратегијата што ја применувате за ревитализација на театарот?
Васко Мавровски: До денес од почетокот на годината, салонот на НУ Народен Театар Битола го посетиле повеќе од 14.000 публика од кој околу 4.000 биле деца. Овај пораст особено кај децата се должи на поставените претстави наменети за деца и работата и поставувањето на задолжителната литература во основните и средните училишта на сцената на НУ Народен Театар Битола, како Снежана и 7-те џуџиња, Чорбаџи Теодос, Црно семе итн. Со оваа стратегија ќе продолжиме и понатаму и ќе ја практикуваме се додека дава резултати, секоја промена која во иднина ќе се случува во театарот ќе биде во согласност со идеите и барањата на публиката бидејќи без публика нема театар.
Шеталиште: Секој театар има своја посебност. Што го прави Народен театар – Битола уникатен според вас?
Васко Мавровски: На ова прашање ќе дадам многу краток одговор, станува збор за најстариот театар во Македонија, кој минатата година прислави 80 години, на чија сцена се говорело на македонски јазик, се случиле 569 премиери, се одиграле 11.670 репризи и го посетиле 3.178.543 гледачи.
Шеталиште: За крај на овој разговор, кои се идните планови на Народен театар – Битола? Што работите во моментов и што ќе понудите до крајот на годината?
Васко Мавровски: Во следниот период не очекуваат учества на 10 фестивали во Македонија и надвор од границите на државата, организација на 11-то издание на Битола Шекспир фестивалот и уште 4 премиери, две од одобрената годишна програма на Министерството за култура и туризам и две од сопствени средства. Како и изминатите 80 години ќе ни се случува театар, но, овој пат театар кој се чувствува, доживува и останува долго време во паметењето на публиката.
Фото: НУ Народен театар – Битола
