Македонскиот медиумски простор од 9 септември 2026 година ќе биде побогат за уште една локална телевизија. Со работа започнува телевизија „Хоризонт“, која својата програма ќе ја емитува на подрачјето на општините Прилеп, Долнени и Кривогаштани.
„Нов хоризонт за Прилеп и регионот. Наскоро со вас…“, стои во објавата на официјалната Фејсбук страница на новиот медиум, со која се најавува почетокот на емитувањето.
Според јавно достапните информации на Агенцијата за аудио и аудиовизуелни медиумски услуги (АВМУ), телевизијата добила дозвола за телевизиско емитување преку јавна електронска комуникациска мрежа што не користи ограничен ресурс на локално ниво.
Одлуката за доделување на дозволата била донесена на седница на Советот на АВМУ одржана на 27 април 2026 година.
Во Регистарот на телевизии на АВМУ, како одговорно лице на телевизија „Хоризонт“ е наведен Петар Георгиевски, додека како уредник е запишан Игор Тасевски.
Со стартот на „Хоризонт“, Прилеп повторно добива локална телевизија, откако претходно во градот програма емитуваше регионалната телевизија „Канал Визија“.
„Канал Визија“ престана со емитување пред девет години, откако со решение на Агенцијата од 31 јули 2017 година беше избришана од регистарот на радиодифузери што емитуваат телевизиска програма.
Новата телевизија „Хоризонт“ се очекува преку својата програма да понуди локални информации и содржини наменети за жителите на Прилеп и околните општини од пелагонискиот регион.
Фото: Фејсбук страница на Телевизија Хоризонт
