Случаите на денга треска и други болести што ги пренесуваат комарците нагло се зголемуваат во Европа, предупреди здравствената агенција на Европската унија, цитирана од АФП. Климатските промени создаваат поповолни услови за ширење на инвазивните инсекти.
Во 2023 година, 130 случаи на денга треска беа пријавени во ЕУ, вклучувајќи ги Исланд, Лихтенштајн и Норвешка (Европска економска област), споредено со 71 во 2022 година.
Ова е „значителен пораст“ во однос на периодот од 2010 до 2021 година, кога се регистрирани 73 случаи, се вели во соопштението на Европскиот центар за превенција и контрола на болести. „Европа сега разбира дека климатските промени создаваат поповолни услови за инвазивните комарци да се шират на претходно недопрените области и да заразат повеќе луѓе со болести како што е денгата“, рече директорот на центарот Андреа Амон.
Минатата година, 67 смртни случаи од западнонилска треска беа регистрирани во 123 региони во девет земји на ЕУ.
Тигрестиот комарец, за кој е познато дека носи вируси денга, чикунгуња и зика, се шири на север, исток и запад во Европа и моментално има население во 13 земји, соопшти Европскиот центар за превенција и контрола на болести. Друг тип на комарец, исто така одговорен за ширење на жолта треска, неодамна е воспоставен во Кипар и неколку периферни региони на ЕУ, како што се Мадеира и француските острови на Карибите.
„Широко се очекува дека климатските промени ќе имаат значително влијание врз ширењето на болестите што ги пренесуваат комарците во Европа, на пример преку создавање поволни еколошки услови за воспоставување и проширување на популацијата на комарци“, забележува центарот.
Координираните контролни мерки се од клучно значење за спречување на овие болести. Отстранувањето на застоената вода од балконите и градините е важна превенција, додава агенцијата.
