Обдукцијата на починатите во пожарот во дискотеката во Кочани е завршена денеска, соопшти попладнево министерот за внатрешни работи Панче Тошковски.
На прес-конференцијата Тошковски рече дека во трагичната несреќа се повредени вкупно 196 лица. Од нив, 93 се лекуваат на клиниките во Скопје, а 80 во болници во странство.
„Точно е дека во близина на дискотеката ‘Пулс’ е пронајден резервоар за нафта, но тој е целосно празен и не постои никаква поврзаност помеѓу сопственикот на резервоарот и менаџментот на дискотеката“, изјави денеска министерот за внатрешни работи Панче Тошковски на прес-конференција во врска со трагедијата во Кочани.
Министерот со ова ги отфрли шпекулациите дека постоела опасност од разорна експлозија, која би ја зголемила трагедијата во дискотеката „Пулс“, каде неодамна се случи голем пожар со жртви и повредени.
Министерот информираше и за текот на истрагата и мерките кои се преземаат за целосно расчистување на случајот. Досега се приведени 18 лица, од кои 16 се задржани.
Последното задржано лице, според министерот, се терети за тешки дела против општата сигурност во врска со предизвикување општа опасност, а станува збор за потписникот на основниот проект за издавање дозвола за работа на дискотеката како кабаре клуб.
– За да обезбедиме целосно независна истрага донесов одлука за разрешување на раководни полициски лица во Кочани и нивно заменување со лица од Скопје – посочи министерот Тошковски.
Во рамки на истрагата биле извршени разговори со вкупно 71 лице, а за 14 лица веќе е одредена мерка притвор во траење од 48 часа.
Полицијата извршила претреси кај две лица вработени во Министерството за економија, од каде била одземена техничка опрема, документација, оружје и муниција. Претрес бил спроведен и кај управителот на дискотеката, а полицијата денес влезе и во просториите на општина Кочани за да обезбеди дополнителна документација.
Дополнително, претреси биле извршени и во службени простории кои ги користел советник во Министерството за економија, поради сомнежи поврзани со дозволите и проектната документација за дискотеката.
Тошковски најави дека истрагата ќе продолжи со максимална сериозност и најстрого санкционирање на сите одговорни за трагичниот настан.
