Црна сабота во австриските Алпи. Најмалку пет лица ги загубија животите во серија силни лавини кои вчера го погодија регионот на Салцбург. Најкритично беше во ски-центарот Гаштајн, каде што под снежните маси смртта ја пронајдоа четворица скијачи.
Како што пренесува „Ројтерс“, во Гаштајн покрај жртвите има и две тешко повредени лица кои биле извлечени од снегот во последен момент. Во масовната спасувачка операција беа вклучени четири хеликоптери и бројни спасувачки тимови кои се тркаа со времето.
Претходно истиот ден, уште една трагедија беше регистрирана во блискиот Бад Хофгаштајн, каде што исто така загина еден скијач. Надлежните во Австрија предупредуваат на зголемена опасност од нови лавини поради временските услови.
