Матицата на иселениците од Македонија, Здружението на Македонците од Егејскиот дел на Македонија од Битола, Сојузот на здруженијата на Македонците и децата бегалци од Егејскиот дел на Македонија МАКЕДОН и Светскиот Македонски Конгрес, во потпелистерското село Трново ќе ја одржат 55-та по ред, Семакедонска средба.
Според востановената традиција, на средбата ќе и претходи утринска богослужба во црквата „Успение на Пресвета Богородица“ со која ќе богослужи г. Петар, митрополит преспанско-пелагониски а потоа во црковниот двор ќе се одржи свечено одбележување на македонскиот национален празник Илинден.
Според програмата, на свеченоста ќе се обратат градоначалникот на Општина Битола Тони Коњановски како покровител на манифестацијата, од страна на Матицата на иселениците од Македонија учесниците на средбата ќе ги поздрави професор д-р Васил Тоциновски, прв и долгогодишен лектор на Лекторатот по Македонски јазик во Риека, како и други гости на организаторот.
-Оваа традиционална манифестација ги обединува Македонците од татковината, иселеништвото и соседните земји, негувајќи ги македонската традиција, култура, духовност и национално единство, најави Александар Јаневски, претседател на Сојузот на здруженијата на Македонците и децата бегалци од Егејскиот дел на Македонија МАКЕДОН, домаќин на традиционалната средба
Во културно уметничката програма ќе настапат членовите на КУД „Гоце Делчев“ и хорот „Сирма Војвода“ од Битола, и КУД „Новаци“ од Новаци.
Фото: плакат Семакедонска средба Трново 2026
Извор: МИА
