Во зимскиот период, кога свеж зеленчук е речиси недостапен, нутриционистите советуваат честа консумација на туршија како одличен извор на витамини и хранливи материи. Ферментирањето, замрзнувањето и скиселувањето се најдобрите начини за конзервирање на зеленчукот, при што се задржуваат голем дел од неговите нутритивни својства.
„Ако туршијата е направена на традиционален начин, со природно ферментирање на собна температура, без додавање адитиви и конзерванси, освен сол, тогаш таа претставува вистинска ризница на хранливи материи“, објаснува нутриционистот Тарик Золотиќ.
Туршијата содржи млечни бактерии – природни пробиотици кои имаат исклучителна улога во одржувањето на здравјето. Пробиотиците придонесуваат за разградување на храната, штитат од штетни бактерии, вируси и токсини, а во некои случаи помагаат и во уништување на канцерогени материи. „Латинскиот збор pro bios значи ‘за живот’, што само по себе говори за нивната важност“, додава Золотиќ.
Пробиотиците заедно со влакната од киселиот зеленчук помагаат во регулирање на варењето, намалување на гасовите и ублажување на воспаленија во цревата.
Особено место меѓу киселите продукти има киселата зелка. Во 100 грама има само 27 калории, што ја прави диетална храна, но содржи и 35 милиграми витамин Ц – околу 35% од дневните потреби. Токму поради ова, во минатото морнарите задолжително носеле буриња со кисела зелка на долги патувања за да се заштитат од скорбут, болест предизвикана од недостиг на витамин Ц.
Киселата зелка е богата и со витамин К, кој е неопходен за правилно згрутчување на крвта и здрави коски, бидејќи овозможува правилно таложење на калциумот. Дополнително, ензимите и влакната од зелката го подобруваат варењето и позитивно влијаат врз срцевото здравје.
Основен рецепт за туршија
За подготовка на туршија најчесто се користат зелени пиперки, зелени домати, краставици, карфиол и моркови, но може да се додадат и зелени динчиња.
Потребни состојки:
2 кг карфиол
2 кг пиперки за туршија
2 кг моркови
2 кг зелени домати
2 кг зелени динчиња
300 г сол
300 г шеќер
250 мл есенција
2 + 8 л вода
Зеленчукот се мие и реди во сад за туршија што може добро да се затвори. Следниот ден се приготвува пресол од 2 литри вода, сол и шеќер, кој се меша со есенција и уште 8 литри вода. Со оваа течност се прелива зеленчукот, при што мора да биде целосно покриен. Садот се затвора и за десетина дена туршијата е подготвена за консумација.
Туршијата не е само зимница што го збогатува трпезата, туку и вистински природен лек што го зајакнува имунитетот и ја одржува виталноста во студените месеци.
