Убавото време денес само по себе е добра вест за службите – снегот брзо го снема од патиштата. Вчерашните врнежи од снег направија проблеми на многу места, возачи останаа заглавени во метеж со часови, лизгавиот коловоз го парализираше сообраќајот во државата. Сега состојбата е стабилизирана и насекаде се вози без проблеми.
„Денес сите магистрални и регионални патни правци се проодни. Сообраќајот се одвива редовно и без никакви забрани“, изјави Костадин Ацевски, директор на ЈП за одржување и заштита на магистралните и регионалните патишта – Скопје
Вчерашната слика беше многу поразлична од денешната. Беа затворени неколку патни правци поради наноси од снег и подмрзнување на коловозните ленти. Беше затворен автопатот од Свети Николе до Миладиновци и полицајци ги пренасочуваа возилата. Проблеми имаше на Стража, а на Плетвар имаше огромни редици возила поради излизган камион на патот. Во следните денови повторно се очекува влажен бран велат од УХМР, но снегови ќе има само на планините.
„Оној влажен бран којшто ќе го имаме во вторник преку целиот ден и потоа во среда, ќе донесе нови врнежи од снег меѓутоа претежно на планините во западните делови, каде шт се очекуваат и пообилни врнежи, а тоа значи и позначително зголемување на снежната покривка. Сепак на пониските места не се очекуваат врнежи од снег“, информира Костадинка Арсовска, дежурен синоптичар во УХМР.
Снежна бура имаше и во Скопје и околината. Но, денес нема ни траги во градот.
Денешната температура е 5 Целзиусови степени. Секаде низ главниот град е чисто, а остатоци од вчерашниот снег има во околните скопски места, како на пример во катлановско Блаце.
Од Центарот за управување со кризи (ЦУК) регистрирале зголемен број на повици на телефонскиот број 112.
„Вкупно 2037 повици за итни случаи се регистрирани во изминатото деноноќие, што е речиси двојно повеќе од претходниот ден“, соопштија од ЦУК.
Денешните информации од службите велат – Стража е проодна, неколку планински патни правци се непроодни, а забрана за камиони има на патот кон „Деве Баир“.
