Вработените од Јавната установа Национален парк „Пелистер“ во текот на вчерашниот и денешниот ден интензивно работеа на уредување на просторот околу Големо Езеро и планинарскиот дом „Димитар Илиевски – Мурато“, кој се наоѓа на 2.218 метри надморска височина.
Материјалите и техничките средства потребни за изведбата беа транспортирани со теренски возила на установата, при што беа преземени активности за подобрување на условите за престој на планинарите и посетителите.
Големото Езеро е едно од највредните природни богатства на Пелистер и претставува идеална дестинација за љубителите на природата кои сакаат да побегнат од летните горештини и да уживаат во спокојот на планината.
Од Националниот парк потсетуваат дека забраната за движење во шума сѐ уште е на сила и ги повикуваат сите заинтересирани посетители да обезбедат дозвола за движење лично од седиштето на установата, Инфо-центарот, или електронски преку нивната веб-страна и Фејсбук страница.
„Апелираме до сите посетители отпадот да го складираат во сопствениот ранец. Тоа е единственото прифатливо место на планина“, истакнуваат од Паркот, додавајќи дека секое несовесно однесување може да се пријави на броевите: 070/281-300, 071/235-972, 075/237-267 и 072/312-215.
Фото: Национален парк „Пелистер”
