Во пресрет на големиот христијански празник Св. Петка, вработените од Јавната установа Национален парк „Пелистер“, во соработка со месното население од село Цапари, интензивно работеа на уредување на просторот околу манастирот „Св. Петка“ и познатата локација Цапарски вир.
Во текот на изминатите три дена и покрај високите температури, беа спроведени активности за расчистување и уредување со цел создавање пријатна и уредна средина за сите верници и љубители на природата кои ќе го посетат ова живописно место.
Од ЈУНП Пелистер истакнуваат дека ваквите акции се од особено значење и претставуваат пример за успешна соработка со локалното население. „Во наредниот период ќе продолжиме да ја јакнеме оваа соработка преку континуирана меѓусебна поддршка насочена кон заштита на природата и промоција на туристичкиот потенцијал на потпелистерието“, велат од Паркот.
Цапарскиот вир претставува лесно достапна и се’ попопуларна дестинација за сите граѓани. Лоциран веднаш над село Цапари, на границата на Националниот парк Пелистер, ова место овозможува бегство од високите температури и уживање во мирната планинска атмосфера.
Истовремено, од ЈУНП Пелистер потсетуваат дека забраната за движење во шума се’ уште е на сила. Сите посетители се должни претходно да обезбедат дозвола за движење, која може да се добие во седиштето на НП Пелистер, во Инфоцентарот, како и по електронски пат преку нивната официјална Фејсбук страница или веб-страница.
Посетителите се повикуваат своето ѓубре да го носат со себе и да не го оставаат во природата, а за секое несовесно однесување, апелираат тоа да се пријави на еден од следните броеви: 070 281 300, 071 235 972, 075 237 267, 072 312 215.
Фото: Национален парк „Пелистер“
