Владата на денешната редовна 160. седница го усвои предлог-законот за парнична постапка, сеопфатно процесно законско решение, кое се подготвуваше подолг временски период во консултација со стручната и академската јавност. Со неговото донесување, како што информираат од Владата, се реализира уште една значајна обврска од Ррзвојната стратегија за правосудството 2024 – 2028, како и дел од програмата за работа на Владата за 2025 година.
Станува збор за системски закон, кој носи суштински и длабински измени со цел унапредување на ефикасноста, транспарентноста и правната сигурност во граѓанските постапки.
Клучните новини во законското решение, како што посочуваат од Владата, се обезбедување поквалитетна правна заштита и поефикасно водење на постапките, унапредување на постапката за вештачење, при што се овозможува судот и по службена должност да изведува вештачење и увид на самото место како доказ, со што се зајакнува улогата на судот во утврдување на фактичката состојба, како и воведување електронска достава од двете страни, како значаен чекор кон целосна дигитализација на судските предмети.
Со новиот закон, како што се наведува во соопштението, се зголемуваат опфатот и забрзувањето на постапките во споровите од мала вредност, а се намалува висината на глобите за учесниците во постапките, со цел поголема правичност и пропорционалност.
Првпат се воведуваат претставнички тужби за заштита на колективни интереси и права, со што се унапредува пристапот до правда за поголеми групи граѓани, а воедно се избегнува големото и нерационално трошење ресурси.
Со усвојувањето на овој закон Владата уште еднаш ја потврдува својата определба за спроведување вистински, суштински, а не козметички реформи во правосудниот систем, во насока на градење ефикасно, модерно и доверливо судство.
Владата останува посветена на континуирано унапредување на правната рамка и институционалниот капацитет во интерес на граѓаните и правната држава.
Извор: МИА
Фото: Влада
