Ученици од Основното училиште со ресурсен центар „Кочо Рацин“ – Битола денеска ја посетија локалната самоуправа, во рамки на едукативна посета со цел поблиско запознавање со работата на општинските институции.
Посетата започна во салата на Советот на Општина Битола, каде што во тек беше комисиска расправа. Учениците беа пречекани од претседателот на Советот, Бојан Бојкоски, како и од присутните советници, кои ги запознаа со улогата и значењето на Советот и начинот на неговото функционирање.
Учениците беа примени и во кабинетот на градоначалникот на Општина Битола, Тони Коњановски. Градоначалникот им говореше за неговите надлежности, значењето на работата на општинската администрација и функционирањето на локалната самоуправа, нагласувајќи ја важноста на институциите во секојдневниот живот на граѓаните.
По средбата, на учениците им беа доделени новогодишни пакетчиња, а посетата беше заокружена со заедничка фотографија со градоначалникот, наставниците и родителите.
