И денеска дел од пациентите кои беа згрижени во болниците во земјава заминуваат на домашно лекување. По состанокот на Кризниот штаб, министерот Арбен Таравари информира дека се испишани 5 пациенти кои се во добра здравствена состојба и од вкупно 21, на лекување сега остануваат уште 16 пациенти. Тој рече и дека надвор од државата остануваат 89 пациенти бидејќи двајца се враќаат во земјава еден од Литванија и еден од Шведска. Тие по пристигнувањето во земјава ќе бидат прво сместени во болниците за да им се провери нивната состојба па потоа и тие заминуваат на домашно лекување. Иако пациентите во критична состојба вчера имаа подобрување, Таравари вели дека денеска повторно има влошување.
„Четири пациенти продолжуваат да бидат во критична состојба, вчера кажав на прес конференција дека малку се подобрени, меѓутоа вчера вечер добивме информација дека повторно овие 4 пациенти се релативно во тешка состојба. Се уште има интубирани пациенти, се уште има пациенти кои што се во тешка состојба, меѓутоа засега повеќето од пациентите се надвор од животна опасност. Засега, тоа не мора да значи дека така ќе продолжи, ние се надеваме и знаеме дека нашите колеги даваат максимум и се надеваме да се подобри нивната состојба“, рече Таравари.
Директорката на Клиника за пластична хирургија Јасмина Георгиевска Павловска вели дека сите оние кои имаат потреба од интервенција на лузните дека тоа ќе се прави на Клиниката. Воедно порачува и како да се однесуваат оние кои имаат заздравени изгореници.
„За лузни имаме многу различни начини за третирање, така што се што може го имаме и ние, се ќе се направи и тоа исто би го нуделе и надвор од Македонија. Треба хидратантни креми без парфеми, без бои, значи да се од медицинска козметика, заштитен фактор 50 задолжително да користат кога ќе излезат на сонце и најубаво е сега воопшто да не излегуваат на сонце.“, изјави Георгиевска Павловска.
Од понеделник се очекува дека ќе бидат пуштени на домашно лекување уште најмалку 5 пациенти, а се очекува во земјава да се вратат и пациенти кои се на лекување во странство.
