Младинска репрезентација до 21 година на Македонија со пресврт победи се радуваше на првата победа во квалификацискиот циклус за ЕП.
Вечерва во Битола, на стадионот „Петар Милошевски“, во рамките на 3. коло, славеше над Ерменија со 2:1, полувреме (0:1).
По негативата во првото полувреме, избраниците на селекторот Горан Станиќ успеаја да направат целосен пресврт.
Двата погодоци за младата селекција на Македонија беа дело на Димитар Трајков, кој најпрво погоди во 54. минута, а потоа и во 83. минута ја затресе мрежата на противникот ѝ ги донесе на Македонија толку посакуваните први три бода во оваа група.
Македонија го отвори натпреварот со со желба и иницијатива уште од првите минути.
По двете прилики на Трајков, една по удар со нога, а друга со глава од непосредна близина, се почувствува дека тимот бара рано водство.
Сепак, тоа не се случи. Освен шансите на Трајков, Македонија не создаде сериозна закана во првиот дел.
Од друга страна, Ерменија беше сконцентрирана на дефанзива, со повремени обиди преку контранапади.
Еден таков напад се покажа како успешен, по асистенција на Хакобјан, Ховханисјан се најде во поволна позиција, пласираше прецизно кон подалечниот дирек и го совлада Џеков.
Нашиот тим очигледно не очекуваше ваков развој на настаните и не успеа да се консолидира до крајот на полувремето.
Во второто полувреме Македонија тргна по изедначување и успеа во својата намера.
По неколкуте обиди на Меметриза и Данев, Трајков конечно го „проби ледот“, по одлично изведен корнер, напаѓачот на Работнички највисоко скокна на пет метри од голот и со глава израмни на 1:1.
Во периодот што следеше, Македонија ја презеде иницијативата и постојано напаѓаше во потрага по победничкиот гол.
До него дојдовме на несекојдневен начин, по една дијагонала на Трајков од сопствената половина, упатена кон Зенку, топката непредвидливо одскокна неколку метри пред излезениот голман на Ерменија, Давтјан, го префрли и заврши во гостинската мрежа.
Фото & Видео : МРТ ТВ
