Гостите го одбија налетот на „пелистерци“ и ја вратија високата предност и победија во Битола како и на првиот дуел во Загреб.
По четири одиграни натпревари во групата „Д“, Пелистер има скор (1-3), каков што има и кипарскиот Керавнос.
Лидер е тимот од Загреб со максимални четири победи, а словачката Превидза е на ефект (2-2).
Мошне рано влегоа во резултатска негатива кошаркарите на Пелистер. По десет минути од играта губеа десет поени (27:17). Гостите од Загреб стартуваа одлично, особено во нападот, и пред се, шутот за три поени. Погодија четири тројки (од пет обиди) во првата четвртина, што беше и „основа“ за двоцифрената предност.
На почетокот на вториот период, Цедевита Јуниор имаше и поголеми (33:19). Слична беше нивната позитива и во 15.минута (40:27), а највисоката ја запишаа две минути подоцна, кога на семафорот во салата „Боро Чурлевски“ во Битола стоеше резултат (28:46).
На полувремето, Пелистер имаше нешто пониска негатива (34:49). Со Брејси Дејвис, како стрелец на 13.поени, следен од Ленгстон Вилсон кој додаде девет, со слаб шут за три поени (1/6), и половична реализација за два (12/24 односно 50%).
А потоа, по големиот одмор, пелистерска фурија, која во рок од шест минути го оддува противникот, со помош на Митревски (реализираше четири тројки), Брејси Дејвис и Л.Вилсон. направи серија (22-7), и стигна до израмнување (56:56)!
Сепак, до истекот на најдобриот период од играта на домашната екипа, гостите некако се одбранија. И со своја мини-серија од (10-2), повторно поведоа, со (66:58), резултат кој беше „на сила“ по 30.минути игра.
На почетокот на последната Цедевита Јуниор продолжи со добра стрелба, особено за три поени. Тоа одново им донесе двоцифрено водство (75:63). по две минути игра во периодот на одлука. За кратко време гостинската екипа се одвои и на 20.поени плус (86:66), што означи и крај на надежите на нашиот претставник дека може неешто повеќе на овој натпревар во кој Брејси Дејвис беше реализатор на 21.поен (и четири скока), Ленгстон Вилсон заврши со 17.поени (и седум скока), Митревски имаше 15 (и два скока), а Стајиќ дополни со девет поени и осум асистенции.
Во петтото коло од групата „Д“ во ФИБА Евро Купот, „пелистерци“ ги чека гостување во Словачка. На 12. ноември играат против екипата на Превидза, која вечерва славеше и повеќе од убедлива победа на гостински терен, против Керавнос од (109:59).
Фото КК Пелистер/ КФМ
