Пелистер од Битола да ја сочува тревата на стадионот „Петар Милошевски“ во Битола натпреварот од третото коло на Првата фудбалска лига против Шкупи го одигра во Кавадарци и победи со 2:0, полувреме 0:0.
Натпреварот започна со испитување на силите и без зрели закани, а топката повеќе ја имаа битолчани. Прв се закани Булатовиќ, но биеше крај голот, а потоа и Мирко Ивановски постигна убав гол, по додавање на Белиќ, но се најде во недозволена позиција и погодокот оправдано беше поништен. Точно по половина час игра Шкупи ја имаше најзрелата шанса, првиот дел заврши со ударот на Ѓорѓе Белиќ од далечина во 42. минута, но крај дирекот на Гроте.
На почетокот на второто полувреме Капинковски го внесе Ристиќ наместо Белиќ и не згреши. Во 59. минута, кога по една долга акција Гроте му одбрани зицер на Булатовиќ, но одбиената топка стигна до Ристиќ, кој од непосредна близина ја затресе небранетата мрежа за 1:0. Конечниот резултат го постигна Булатовиќ со прекрасен гол со левата нога, на додавање на играчот на натпреварот, Петар Ристиќ.
Со оваа победа Пелистер скокна на петтото место со шест бода. Во следното четврто коло Пелистер в недела гостува во Ѓорче Петров.
