Денес со огромна радост и гордост им го честитам првиот училишен ден на сите ученици во нашата општина, а посебно на најмалите – првачињата.
Оваа година имаме околу 650 првачиња, и со задоволство можам да истакнам дека после неколку години конечно бележиме тренд на зголемување – вистински знак на надеж и позитивна иднина за нашиот град.
На нашите најмлади ученици им посакувам среќа и љубопитност на нивното големо патување во светот на знаењето. На наставниците и воспитувачите им посакувам трпение и посветеност, а на родителите, благодарност за нивната неизмерна поддршка.
Како Локална самоуправа вложуваме силно во образованието:
✅ Бесплатен здрав оброк за учениците од I до III одделение
✅ Бесплатни униформи за сите 6.000 ученици во основното образование
✅ Реконструкции и опремување на сите училишта и градинки
✅ Нова спортска сала во ООУ „Блаже Конески“
✅ 8 прочистувачи на воздух за училиштата и градинките
Денес лично ги посетивме и на сите ученици им посакавме успешна учебна година. Првачињата ги израдувавме со симболичен подарок – училишен прибор, за со насмевка и љубопитност да го започнат своето школско патување.
Горд сум што Општина Прилеп се приклучува кон општествено-одговорната иницијатива „Среќно прваче“. Голема благодарност до Халк банка за оваа важна поддршка, заедно ги градиме условите за успешен и посветол образовен пат на нашите најмали сограѓани.
Нашата цел е јасна, секое дете во Прилеп да има еднакви услови, подобро образование и безгрижно детство. Вложувајќи во образованието, вложуваме во иднината на нашата општина и нашата татковина.
На сите ученици, наставници и родители им посакувам успешна и среќна учебна година!
