Во Кристалната сала на КИЦ – Офицерскиот дом во Битола, битолскиот фотограф Сашо Ставрев ја отвори својата антологиска фото-изложба посветена на 45 годишнината од Интернационалниот фестивал на филмската камера „Браќа Манаки“.
Изложбата, која содржи повеќе од 500 фотографии распоредени низ 28 паноа, претставува визуелна ретроспектива на еден од најстарите фестивали во светот посветен на уметноста на кинематографијата. Преку објективот на Ставрев, посетителите патуваат низ времето од првите изданија на фестивалот до денешните светски ѕвезди кои чекорат по црвениот тепих на Широк Сокак.
„Секој обид да се зборува за значењето на оваа изложба ќе биде блед обид да се долови нејзината длабочина. Пасијата со која Сашо Ставрев ги ‘следи и лови’ ликовите на лауреатите, актери, режисери, сниматели и продуценти е живопис на еден фестивал кој ни го донесе светот дома, а нас, битолчани, нè однесе во светот на филмската магија“, беше истакнато на отворањето.
Публиката имаше можност да ужива и во настапот на деветгодишната Теона Димеска на виолончело, во придружба на нејзиниот ментор Зисо Пуровски.
„Фестивалот ‘Браќа Манаки’ датира од 1979 година и е најстар во светот што ја вреднува работата на кинематограферите. Низ годините во Битола пристигнувале бројни филмски имиња од Карпо Година, Раде Шербеџија и Милена Дравиќ, до светски познатите оскаровци Свен Никвист, Виторио Стораро, Бранко Лустиг и Роџер Дикинс“, потсети Сашо Ставрев.
Тој додава дека низ неговиот објектив во изминатите децении поминале личности со вкупно 19 освоени Оскари и 66 номинации, што ја претвора Битола во вистинска филмска престолнина.
Континуираното фотографирање на фестивалот, како што истакнува, е и личен аманет од самиот Милтон Манаки, кој му рекол „Продолжи да фотографираш, тоа ти го оставам како аманет“. Денес, тој аманет живее преку Петар Ставрев и неговиот син Сашо, кои ја продолжуваат семејната традиција и ја чуваат визуелната меморија на градот и фестивалот.
Изложбата е овозможена со поддршка од Министерството за култура и туризам, а публиката може да ја посети наредните денови во Кристалната сала на Офицерски дом, КИЦ Битола.
Фото: Сашо Ставрев
