Во текот на минатата недела, Царината спречила обид за нелегална трговија на дрога марихуана, лекови, а спречен е и обид за криумчарење цигари, како и стока која повредува право од интелектуална сопственост.
„На граничен премин Блаце царинските службеници спречија обид за нелегална трговија на опојна дрога, марихуана. Притоа, запленети се 36,4 килограми опојна дрога марихуана, чијашто вредност на нелегалниот пазар на големо се проценува од близу 100 илјади евра, а на мало до три пати повеќе. Против лицето е поднесена кривична пријава заради основано сомнение дека сторил кривично дело неовластено пуштање во промет на наркотични дроги.
На граничен премин Јажинце царинските службеници спречија обид за криумчарење на вкупно 7.847 ленти разни лекови. Притоа запленети се лекови ксалол од еден мг, бромазепам од 6 мг, флормидал од 15 мг и бенсадин од 10 мг со вкупна вредност од 8,7 милиони денари. Случајот е откриен при контрола на товарно моторно возило во сопственост на македонска фирма. Возилото и лековите се запленети, а против сторителот ќе се поднесе кривична пријава заради прекршување на кривичниот законик.
На излез од државата на граничен премин Деве Баир, царински службеници запленија 12.690 евра.
Царински службеници на граничниот премин Богородица запленија 44 штеки цигари со вкупна вредност од 128.100 денари, откриени при контрола на празен камион со македонски регистарски таблички.
Мобилни тимови запленија 1.230 парчиња облека, 1.300 кутии за накит, и 455 килограми текстилно платно откриени при контрола на стока пријавена за увозно царинење во царинска испостава Скопје 1.
Во четири случаи, вкупно 38.462 разни производи со потпис на заштитени трговски марки се запленети од страна на мобилни царински тимови и царински службеници на граничен премин Богородица поради сомнение дека повредуваат права од интелектуална сопственост. Стоката била наменета за увозници од Скопје и Тетово. Во тек е процедура за утврдување на нивната оригиналност“, се вели во соопштението на Царината.
