Во рамките на апелот на Црвениот крст на Северна Македонија за помош на оние кои настрадаа во катастрофалниот пожар во Кочани од 16 март 2025 година, досега се собрани 156.542.967 денари.
Според информациите од Црвениот крст, заклучно со денешниот ден, оваа организација во неколку наврати изврши исплата на средства на погодените семејства од пожарот во Кочани. “Со овие средства досега е обезбедена финансиска поддршка на семејствата на починатите лица во вкупен износ од 52.038.593 денари”, се вели во извештајот.
За лицата кои беа повредени во пожарот и се лекуваа во странство, вкупно се исплатени 44.163.258 денари, додека за оние кои се лекуваа во земјата, вкупно се исплатени 11.247.250 денари. “Вкупниот досегашен трансфер на средства изнесува 107.449.101 денари”, се наведува во соопштението.
Преостанатите средства во висина од 46.593.866 денари на сметката на Црвениот крст, како што се наведува, ќе бидат распределени откако ќе се завршат проценките за сериозноста на повредите, времетраењето на лекувањето и потребите на повредените, кои ги спроведуваат стручни институции во земјата. Целта е да се објективизира процесот и да се задоволат реалните потреби на настраданите. Црвениот крст најавува дека навремено ќе информира за распределбата на средствата.
Црвениот крст изразува благодарност до сите досегашни донатори кои придонесоа и продолжуваат да придонесуваат за мобилизирање хуманитарна помош за настраданите и нивните семејства. Тие продолжуваат со своите активности на терен, фокусирајќи се на обезбедување психолошка поддршка, во обид “да дадеме скромен придонес во надминување на последиците од катастрофалниот настан”.
