Европа би можела да се соочи со недостиг на гориво веќе следниот месец ако продолжат потресите на енергетскиот пазар, предупреди извршниот директор на „Шел“, Ваел Саван. Тој оцени дека кризата на Блискиот Исток веќе не се чувствува само во регионот, туку почнува да го притиска и поширокиот глобален пазар на горива.
Според предупредувањето, ударот прво се чувствува кај авионското гориво, а следни под притисок би можеле да бидат дизелот и бензинот. Саван вели дека ако сегашната состојба продолжи, Европа веќе во април може да почне посериозно да ги чувствува последиците пренесува трн.
Тој посочува дека делови од Азија веќе воведуваат мерки за штедење енергија и намалување на потрошувачката, што е сигнал дека пазарот влегува во поосетлива фаза. Според Саван, „Шел“ веќе разговара со влади за можните механизми што би се активирале ако состојбата дополнително се влоши, вклучително и мерки за ограничување на побарувачката и користење на резервите.
Проблемот дополнително се продлабочува затоа што дел од товарите со гориво се пренасочуваат кон Азија, каде цените и побарувачката растат побрзо. Тоа значи дека Европа не се соочува само со ризик од повисоки цени, туку и со посилна конкуренција за истите енергетски ресурси, токму пред периодот кога потрошувачката традиционално расте.
Иако засега нема официјални најави за рестрикции, пораката од врвот на „Шел“ е јасна: ако кризата продолжи, прашањето нема да биде само колку ќе чини горивото, туку и колку сигурно Европа ќе може да се снабдува. Во вакви услови, енергијата повторно станува прашање на безбедност, а не само на пазар.
