Шкендија победи во Скопје и останува во трка за титулата, додека Работнички ја продолжува борбата за опстанок.
Шкендија оствари убедлив триумф против Работнички славејќи со 0-3 на стадионот на ФФМ. Тимот на Јетон Беќири рутински стигна до трите бода.
Шкендија поведе веќе во седмата минута. Вебстер нафрли од левата страна, Тамба од прва го пронајде Красниќи кој од непосредна близина ја погоди гредата, но беше присебен и од втор обид ја затресе мрежата.
Следната голема закана на Шкендија дојде во 24.минута. Љатифи шутираше од слободен удар од 30 метри, за малку над гредата од голот на Работнички.
Во 37.минута, Шкендија го удвои водството. Брза акција на гостите, проигран беше Тамба, кој излезе пред голманот Ондоа и рутински го совлада.
На почетокот на второто полувреме, Работнички имаше убава можност да ја намали негативата. Гаје се лизна, нововлезениот Аритон Мехмеди беше во одлична шанса, шутираше, но Гаје ја исправи својата грешка и одбрани.
Шкендија и дефинитивно го реши победникот во 71.минута. Тамба подготви шанса за Љатифи, кој со удар од 12 метри успеа да зголеми на 0-3.
