Јавната установа Национален парк „Пелистер“-Битола воведе превентивни мереки за заштита на природата и безбедноста во истоимениот национален парк.
Од ЈУ Национален парк „Пелистер“ информираа дека мерките се однесуваат на посетителите на паркот кои во наредниот период со претходна најава ќе може да престојуваат во паркот и јасно да ја посочат патеката на движење низ националниот парк.
-За влез во националниот парк „Пелистер“ потребно е да се поднесе барање за дозвола за влез. За секој посетител подготвивме формулар, кој е едноставен за пополнување во кој се посочува патеката на движење, придружба доколку посетителот ја има, локации кои посетителот сака да ги посети и користење на возило доколку користи, посочија од ЈУНП „Пелистер“-Битола.
Правилата за влез и престој во националниот парк „Пелистер“ ќе се применуваат без исклучок и на тој начин превентивните мерки ќе бидат ефикасни, нагласуваат од таа национална установа.
