Кандидатката за советничка од Либерално демократската партија (ЛДП) во рамки на коалицијата „Искуство за успех“, Љубица Стерјева, на крајот од изборната кампања упати порака до граѓаните на Битола, истакнувајќи дека локалната заедница има потреба од одговорна и сериозна политика која ќе го стави образованието во центарот на развојот.
„Разговорите со битолчани ми покажаа дека сите сакаме исто: подобро образование, поголеми можности за младите и услови каде што знаењето се цени. Верувам дека промените започнуваат токму во нашите училници“, порача Стерјева.
Таа нагласи дека ќе се залага за подобри услови за наставниците и учениците, како и за јасна визија за развој на образованието во градот. Според неа, Битола треба да ја врати својата традиција како центар на знаењето, културата и вредностите.
„Време е повторно да ја вратиме гордоста на нашиот град, да создадеме средина каде децата ќе учат со љубов, а младите ќе имаат можност да успеат токму овде, дома“, додаде Стерјева.
Таа ги повика граѓаните во недела да излезат на гласање и да го поддржат бројот 1 „за напредок, за одговорна и сериозна локална политика, за Битола што учи, расте и верува во себе“.
Либерално демократска партија
