„Дупло дно“ од Горан Стефановски, во режија, дизајн на сцена и костими на Наташа Поплавска, е претставата што театарот „Војдан Чернодрински“ од Прилеп ја изведе на матичната сцена. Драмата Стефановски ја пишува во 1983 г. нарекувајќи ја „пасија во три става и кода“ што наликува на музичката форма свита и во неа ги отвора проблемите на поединецот уметник, лудак и револуционер наспроти системот, отелотворен во ликот на министерот за култура.
Режисерката Наташа Поплавска во „Дупло дно“ од Стефановски го отвора прашањето како уметничката стварност денес кореспондира со реалноста. Таа го прикажува лажниот ангажман на уметниците што се борат за „уметничката слобода“, а всушност се борат за позиција на министри за култура, со цел да ги задоволат своите лични интереси и заработки, така што чистата уметност станува памфлет за статус. Со својата режиска постапка таа се обидува да ја погледне драмата како реално шоу со музичка свита, ставајќи ја актерската игра пред камери, додавајќи музичари раководени од композиторот Ристо Вртев.
Драматург е Ивана Нелковска. Во претставата играат Катерина Клинческа Чакмакоска, Даниела Иваноска, Димитар Ѓорѓиевски, Игор Трпчески, Зоран Иваноски, Михајло Миленкоски, а музичари се Томе Темелкоски, Методија Костоски, Ана Митоска и Филип Јездиќ.
На Поплавска ова ѝ е трета соработка со Прилепскиот театар.
