Општина Битола денеска ја замени спомен-плочата на споменикот на херојот Александар Турунџев, откако јавноста реагираше дека претходно не била напишана на македонска кирилица.
Новата табла е поставена експедитивно, а текстот сега е напишан целосно на македонски јазик и со македонска кирилица, со што е исправен пропустот.
Од локалната самоуправа порачаа дека ваквите корекции се одраз на посветеноста кон зачувување на јазикот и националниот идентитет, како и должната почит кон хероите од македонската историја.
Граѓаните упатија честитки до Општина Битола за брзата реакција и исправката, со порака: „Зборуваме на македонски јазик, пишуваме со македонска кирилица“.Споменикот на Александар Турунџев останува симбол на борбата за слобода и потсетник за хероите кои оставиле трага во македонската историја.
