Во Скопје се одржа конференцијата „30 години на европскиот пат: Северна Македонија – Европска Унија – следни чекори“ на која беа одбележани три децении односи меѓу државата и Европската Унија.
На настанот се обратија високи претставници од државата, дипломатскиот кор и академската заедница, при што беа отворени прашања за досегашниот тек на евроинтеграциите, како и за следните чекори на патот кон членство.
Првиот заменик на претседателот на Владата и министер за европски прашања, Беким Сали, истакна дека европската интеграција останува стратешки приоритет на државата. Тој нагласи дека по завршувањето на скрининг процесот, фокусот е ставен на забрзана испорака на реформи.
„Триесет години партнерство и 25 години од Спогодбата за стабилизација и асоцијација покажуваат дека нашиот европски пат е јасен и неповратен. Денес, интеграцијата не е само цел, таа е процес на конкретна испорака на резултати”, истакна Сали.
Тој додаде дека преку Реформската агенда и Планот за раст, државата веќе обезбедува мерливи резултати во клучните области како владеење на правото, јавната администрација и економското управување. Воедно подвлече дека кредибилен процес на проширување бара паралелна посветеност, силна реформска испорака од земјите кандидати и предвидливост од страна на Европската Унија.
„Нашата амбиција е јасна: полноправно членство во Европската Унија”, порача Сали.
Амбасадорот на ЕУ во земјава, Михалис Рокас, порача дека европските партнери остануваат подготвени да ѝ помогнат на државата да ја надмине последната пречка на патот кон членството.
„Патот до таму е многу поблиску отколку што мислиме, но недостига желба за обединување низ политичкиот спектар”, истакна Рокас, додавајќи дека доколку договорот од 2022 година бил навреме реализиран, земјата ќе била меѓу водечките кандидати.
Тој нагласи дека започнувањето на преговорите е клучен момент кој ја менува перцепцијата и ја зајакнува вербата во процесот. Според него, проширувањето е политичка одлука, но и неопходен одговор на новите геополитички предизвици.
„Живееме во време кога меѓународниот систем базиран на владеење на правото е разнишан. ЕУ мора да одговори на овие предизвици со силен фокус на проширувањето. Нема да дозволиме празнини на европскиот континент”, порача Рокас.
Деканот на Правниот факултет, Сашо Георгиевски, осврнувајќи се на изминатите три децении, истакна дека почетниот период бил обележан со очекувања и нереална надеж, но и со разочарувања од сопствени слабости.
Тој нагласи дека во текот на целиот процес постојат две константи: континуираната поддршка од граѓаните за евроинтеграциите и постојаната поддршка што земјата ја добива од Европската Унија.
Конференцијата опфати и две тематски панели посветени на геополитиката, младите и идниот бран на проширување, како и на владеењето на правото и економската конвергенција како основа за кредибилно членство, при што учесниците разменија ставови за предизвиците и можностите што стојат пред Северна Македонија на нејзиниот европски пат.
