Грчките власти најавија целосно затворање на источната внатрешна обиколница во Солун во двата правци. Причината е рушењето на мостот „Агиос Павлос“, клучен дел од големиот инфраструктурен проект Flyover кој го менува градскиот сообраќај.
Затворањето ќе започне во петок, 13 март во 23 часот и ќе трае цели 48 часа, до недела, 15 март во 23 часот. Сообраќајот ќе биде стопиран на делницата помеѓу клучките К7 (Ептапирхио) и К8 (Тријандрија), што значи дека возачите ќе мора да се снаоѓаат низ градските улици, каде што се очекува значително зголемување на метежот.
Грчката полиција апелира до сите што патуваат низ Солун да го избегнуваат овој потег доколку не е неопходно, да ги почитуваат времените сообраќајни знаци и внимателно да ги следат инструкциите на теренските служби. Градските власти предупредуваат дека овој викенд возачите треба да предвидат подолго време за движење и трпение заради преусмерувањата.
