Битолското културно лето продолжи во знакот на детската радост, музиката и театарската традиција. Пред Офицерскиот дом, актерите од култната серија „5+ фамилија“, која со години е препознатлива како пионер во неформалното образование на децата во Македонија, приредија незаборавна вечер за најмладите посетители.
Децата, заедно со своите родители, баби и дедовци, уживаа во изведбата на најпознатите песни и хитови од серијата, која низ забавни содржини и денес ги пренесува вредностите на пријателството, добрината, почитта и заедништвото. Како што истакнаа актерите, „5+ фамилија“ и понатаму има мисија да ги учи децата како да бидат подобри луѓе и подобри другари.
Во рамките на „Бит Фест“, се одржа и уште едно издание на културниот претчас „Културен Хорологион“, предводен од проф. д-р Марјан Танушевски. Присутните имаа можност да се запознаат со богатата историја на детскиот театар во Битола и да дознаат повеќе за неговите почетоци.
Танушевски потсети дека првата театарска претстава за деца во Битола била едночинката „Итра лисица среде стапица“, изведена во 1947 година, додека првата куклена претстава „Силјан Штркот“ била поставена во 1948 година. И двете претстави биле режирани од легендарниот Петре Прличко, оставајќи значаен белег во развојот на македонскиот детски театар.
Со ваквите содржини, „БитФест“ продолжува успешно да ги спојува забавата, културата и образованието, нудејќи програма која привлекува публика од сите генерации.
Фотографии: Сашо Ставрев
