Четирите пациенти повредени во пожарот во Кочани и кои се лекуваат надвор од земјава, за кои вчера беше соопштено дека се критични, денеска се во подобра состојба, соопшти министерот за здравство Арбен Таравари. Тој рече дека до утре ќе се намали бројот на пациенти кои се лекуваат надвор од земјава на 99.
„Во скопските болници се лекуваат 24 пациенти, од кои 7 се во Клиничкиот центар, 8 во болницата „8 Септември“, 6 во старата градска болница и 3 во приватни клиники. Од 24 пациенти, 9 денеска ќе бидат пуштени на домашна нега. Утре во скопските болници ќе останат само 15 пациенти. Во странство закрепнуваат вкупно 108 лица, од кои за 8 е најавено дека ќе се вратат, 2 од Белгија, 2 од Австрија, 2 од Хрватска и 2 од Турција. Пациент кој закрепнува во Шведска веќе е на домашно лекување, но ќе остане таму уште неколку дена додека се врати“, вели Арбен Таравари.
Тие кои веќе се пуштени на домашно лекување се во добра здравствена состојба, соопшти директорот на Клиниката за токсикологија, Андон Чибишев.
Директорката на Клиниката за пластична и реконструктивна хирургија, Јасмина Ѓеоргиевска Павловска рече дека во болницата во Кочани се испраќаат екипи за пациентите со полесни изгореници со цел тие да не патуваат до главниот град.
Павловска исто така апелираше пациентите да не користат креми за изгореници кои се продаваат на социјалните мрежи бидејќи не е познато нивното потекло.
